1992 жылдан бері Қазақстан премьер-лигасында ең көп гол соққан кімдер?

Қазақстан Тәуелсіздік алған соң, футболдан ішкі чемпионатын 1992 жылдан бері өткізе бастады. Осы жылдар ішінде ел біріншілігінде бірнеше футболшы 100-ден астам гол соға алды. Қазіргі футболшылардан бұл тізімге «Астана» шабуылшысы Марин Томасов жақындап қалды.

Бүгін топ басындағы алғашқы 20 сұрмергенді санамалап көрсек. Әрине, бірінші орында қазіргі кезде «Тобыл» клубының бас бапкері болып жүрген – Нұрбол Жұмасқалиев. Ол 1997-2018 жылдар аралығында 167 голдың авторы атанды. Жұмасқалиев голдарының басым бөлігін «Тобыл» сапында соққан. Сондай-ақ «Нарын» (Орал), «Локомотив» (Астана) командаларында ойнаған кезде де мергендік танытқан.

Айтпақшы, 11 мамыр Нұрбол Жұмасқалиевтің туған күні. 

Екінші орында Көкшетаудың «Оқжетпес» клубының директоры Мұрат Тілешов тұр. Ол 1998-2016 жылдары қарсылас қақпасынан 148 кіргізген. Тілешов голдарын «Тараз», «Жеңіс», «Шахтер», «Ертіс», «Астана», «Ақтөбе», «Ордабасы», «Жетісу», «Атырау» командаларында ойнағанда салған.

Алғашқы үштікті Тілешевтің жерлесі марқұм Олег Литвиненко қорытындылайды. Ол екеуінің арасын тек бір гол бөліп тұр. Литвиненко голдарының көбісін «Елімай» және «Тараз» сапында соққан.

Қазір доп теуіп жүргендерден алғашқы жиырмалыққа Марин Томасов кіріп үлгерді. «Астана» сұрмергені 89 голдың авторы атанған. Томасов қазір 12-орында тұр. Жақын арада топ-10 бомбардирдің қатарына кіруге жақын.

«Қайрата» сапында өнер көрсететін бразилиялық Жоао Паулоның еншісінде 75 гол бар. Ол 26-орында тұр. Сондай-ақ Роман Мұртазаев (66), Бауыржан Исламхан (60), Абат Айымбетов (54), Асхат Тағыберген (48), Тимур Досмағамбетов (44), Серікжан Мұжықов (42), Жасұлан Молдақараев (40), Аслан Дарабаев (39) алғашқы 100-діктің қатарында. 

Қазақстан премьер-лигасының 1992 жылдан бергі үздік сұрмергендері (топ-20):

1. Нұрбол Жұмасқалиев – 167 гол

2. Мұрат Тілешов – 148

3. Олег Литвиненко – 147

4. Нұркен Мәзбаев – 142

5. Андрей Мирошниченко – 115

6. Ұлықбек Бақаев (Өзбекстан) – 111

7. Андрей Финонченко – 103

8. Әлібек Бөлешов – 100

9. Александр Шатских – 96

10. Руслан Иманқұлов – 96

11. Қайрат Әубәкіров – 94

12. Азат Нұрғалиев – 90

13. Марин Томасов (Хорватия) – 89

14. Жерар Гоу (Кот-д’Ивуар) – 88

15. Виктор Антонов – 85

16. Руслан Дүзмамбетов – 85 

17. Гурам Макаев – 85

18. Владимир Логинов – 85

19. Олег Малышев – 84

20. Таңат Нөсербаев – 85.