10.05.2025
Сенсациялар шеруі: Бірінші лиганың 5-тур қорытындысы
8–9 мамыр күндері футболдан Бірінші лига бәсекесінің 5-тур ойындары өтті. Осы турдан кейін турнир кестесінде ұпай жоғалтпаған бірде-бір команда қалмады.
Кездесулердің нәтижесі:
«Ақтөбе-Ж» – «Қайрат-Жастар» – 1:1
«Түркістан» – «Тараз» – 1:0
SD Family – «Оңтүстік» – 0:3
Ertis – AKAS – 1:0
«Екібастұз» – «Шахтер» – 2:2
«Хан-Тәңірі» – «Жетісай» – 2:0
«Каспий» – «Алтай» – 1:2
8 мамыр
«Ақтөбе-Ж» – «Қайрат-Жастар» – 1:1
Бесінші тур ойындары көпшілік үшін тосын нәтижемен басталды. «Ақтөбе» мен «Қайраттың» жастар командасы арасындағы бәсекеде алматылықтар айқын фаворит саналса да, сырт алаңда Ақтөбеден әрең дегенде бір ұпай олжалап қайтты. Алаң иелері екінші таймның ортасында есепті ашып, қосымша уақыттың соңғы сәттеріне дейін алда тұрған. Алайда қосымша уақыттың 5-минутында «Қайрат-Жастар» таразы басын теңестіріп, «Ақтөбе-Ж» клубының маусымдағы алғашқы жеңісіне жол бермеді.
«Түркістан» – «Тараз» – 1:0
Бұл турға дейін «Түркістан» бірде-бір ойында жеңіске жете алмай, турнир кестесінде соңғы орында тұрған еді. Ал жамбылдықтар көш басындағы командаларды өкшелеп келе жатқан. Сол себепті де «Тараз» бұл кездесуден үш ұпай алуды көздеген. Алайда түркістандықтар қарсыластарынан басым түсіп, турдың сенсациясын жасады.
SD Family – «Оңтүстік» – 0:3
Сенсациялар легі SD Family мен «Оңтүстік» арасындағы матчта да жалғасты. Турнир кестесінде үздік үштікті қуып келе жатқан астаналық клуб өз алаңында өткен турда ғана алғашқы ұпайын еншілеген шымкенттіктерден ойсырай жеңілді. «Оңтүстіктің» 21 жастағы шабуылшысы Мағжан Тоқтыбай кездесудің басты кейіпкеріне айналды. Ол хет-трик авторы атанып, командасына қатарынан екінші жеңісті сыйлады.
Ertis – AKAS – 1:0
Бұл кездесуде ешқандай сенсация тіркелмей, ойынның фаворит командасы жеңіске жетті. Екі клуб та биыл Бірінші лигаға қосылған, бірақ AKAS тек бейімделу кезеңінде жүрсе, Ertis-тің мақсаты – Премьер-лигаға оралу. Соған қарамастан, Қазақстанның бес дүркін чемпиондары жоғары дивизионда ойнамаған команданың қақпасына небәрі бір гол соғуға шамалары жетті. Ertis өз алаңында 1:0 есебімен жеңіске жетіп, бес тур қатарынан өз қақпасына гол өткізген жоқ.
9 мамыр
«Екібастұз» – «Шахтер» – 2:2
Екінші ойын күні тағы бір фавориттің сүрінуімен басталды. «Шахтер» сырт алаңда «Екібастұзды» жеңе алмады. Кездесудің есебін бірінші болып қонақтар ашқанымен, бірінші тайм соңына дейін алаң иелері таразы басын теңестіріп үлгерді. «Екібастұз» футболшылары екінші тайм соңына қарай тағы бір гол соғып, жеңіске жетуге шақ қалған еді. Алайда қосымша уақытта Айдос Тәттібаевтың дәл соққысы «Шахтерді» жеңілістен құтқарып қалды. Қарағандылықтар қатарынан екінші турда ұпай жоғалтты.
«Хан-Тәңірі» – «Жетісай» – 2:0
Бұл кездесудің тағдыры матчтың алғашқы отыз минутында шешілді. Алаң иелерінің жартылай қорғаушысы Диас Күшқұмбаев алдымен сары қағаз алып, артынша төрт минуттың ішінде екі гол соғып, командасына жеңіс сыйлады.
«Каспий» – «Алтай» – 1:2
Бірінші лиганың бесінші тур ойындары сенсациямен басталып, дәл солай аяқталды. Бұл турға дейін қатарынан төрт ойында жеңіске жетіп, турнир кестесінде жеке-дара көш бастап келе жатқан «Каспий» өз алаңында «Алтайдан» жеңіліп қалды. Бірінші тайм соңында қонақтар сапынан Ибрагим Дадаев есепті ашса, екінші таймда да сол Дадаев пенальтиден дубль авторы атанды. Алаң иелері 11 метрлік айып добын сәтті орындағанымен, бұл гол тек есепті қысқартуға ғана жетті. Осылайша «Каспий» өз алаңында 1:2 есебімен жеңіліп, көшбасшылықты Павлодардың Ertis клубына беріп қойды.
6-тур аясында өтетін кездесулер:
15 мамыр
«Жетісай» – Ertis
«Каспий» – «Түркістан»
AKAS – «Екібастұз»
16 мамыр
«Алтай» – «Қайрат-Жастар»
«Оңтүстік» – «Хан-Тәңірі»
«Тараз» – SD Family
«Шахтер» – «Ақтөбе-М»
Қосымша жаңалықтар
ӘЙЕЛДЕР ЛИГАСЫ
Әйелдер лигасы: Бесінші турдан кейін көшбасшы ауысып, «Астана» клубы алғашқы жеңісіне қол жеткізді
13.05.2025
