Фархат Қаналы: Ақтөбедегі ойыннан «Big Drama Show» күтеміз

30-31 мамыр күндері Қазақстан Премьер-лигасының 11-тур ойындары өтеді. Осы ретте Qazsport арнасының комментаторы Фархат Қаналы KFF League сайтына болжам жасады.

 «Елімай» - «Астана»

Осы турдың алғашқы шымылдық ашар ойыны Семейде өтпек. «Елімай» өз алаңында «Астананы» қабылдайды. Алаң иелері бұған дейін өз жерінде «Қайрат» секілді азулы команданы жеңгенімен, сырт алаңда «Қызылжардан» айласын асыра алмады. Сондықтан сол олқылықтың орнын толтыруға тырысады. «Астана» болса ала-құла ойын көрсетіп жүр. Клубтың басындағы қаржылық мәселелер әлі толық шешілмегенге ұқсайды. Дегенмен соңғы «Жеңіспен» ойындағы камбэк елордалық ұжымға психологиялық көмек болғаны анық. Бұл матчта екі команда да гол соғады деп ойлаймын. 

«Жеңіс» - «Ордабасы»

Айтқандай «Жеңіс» соңғы ойында топ-клубтарға қарсы қалай ойнай алатынын көрсетті. Пірәлі Әлиевтің келуі командаға жаңа серпін бергендей. Дегенмен елордалық команда әлі бір ойында жеңген жоқ. «Ордабасы» болса күтпеген жерден «Ұлытаудан» ұтылып үш ұпайдан айырылды. Дегенмен Андрей Мартин баптайтын ұжым бұған дейінгі кездесулерді сәтті өткізгенін айту керек. Бұл кездесуде «Ордабасы» 1 гол айырмашылығымен ұтады деп ойлаймын. 

«Тобыл» - «Атырау»

Бұл турда чемпионаттағы ең көп гол соққан команда мен ең көп гол өткізген ұжымдар ойнайды. Өз үйіндегі ойында «Тобыл» қонақтарды сенімді жеңеді деп ойлаймын. «Атырауда» қазір жағдай қиын, басшылық ауыс-түйіс жемісін бермей жатыр. Сондықтан оларға «Тобыл» қақпасына гол соғу оңай болмас.

«Ақтөбе» - «Қайрат»

Турдың орталық матчында «Биг драма шоу» болады деп сенемін. Бұл екі команданың арасындағы ойын қашанда қызықты өтеді. Ақтөбелік жанкүйерлер «Қобыланды батыр» стадионында қонақтарға жақсы қысым көрсететіні анық. «Қайраттың» соңғы ойындарда шабуыл шебі әлсіреп барады. Бразилиялықтардың жоқтығы білінеді. Ал жас ойыншылардың фанаттар қысымына төтеп беруі қиын. «Ақтөбе» клубында кадрлық мәселе бар екені белгілі. Жаңа бапкер толық ойынды қалыптастырып үлгермегендей. Матчта не пенальти не қызыл қағаз болуы ықтимал. Жалпы есеп тең болады деп ойлаймын. 

«Оқжетпес» - «Қызылжар»

Көкшетаулық команда өз алаңында жеңілсе де тістесіп ойнап, әйтеуір гол соғып кетіп жатады. «Оқжетпес» сапындағы отандық ойыншылардың екінші тынысы ашылғандай. «Қызылжар» болса Милич Чурчичтің келуімен біраз ойын жүйесі реттеліп қалды. Турнирлік кестенің ортасындағы ұжымдардың ойыны тартысты болады. Дегемен голға сараң болады деп ойлаймын. Тең есеп болуы ықтимал.

«Ұлытау» - «Тұран»

Өз алаңындағы ойында премьер-лига дебьютанттары барын салады. Азовскийдің командасы енді-енді жоғары лигаға бейімделіп жатқандай көрінеді. Команда сапында тәжірибелі ойыншылар бар. Сырт алаңдағы соңғы жеңіс «Ұлытауға» жақсы күш болады. «Тұран» болса биыл құрамға біраз жақсы көзтаныс легионерлерді алғанымен сәттілік серік болмай жатыр. Қосалқы құрамдағы ойыншы санының аздығы да сезіледі. Жуковский бар кадрмен жақсы ойын қоюға тырысып жүр. Соңғы ойында «Тобылдан» жеңілсе де лайықты қарсылық көрсетті. Бұл кездесуде «Тұран» жеңілмеуі керек. 

«Қайсар» - «Жетісу»

Қасқырлар қазір бабында. Турнирлік кестедегі басты қарсыластардан ұпай алғасын премьер-лигадан ұшу мәселесін сәлде болса кейінге шегерді. Екі ойындағы алты ұпай, басшылықтың демеуі, жанкүйер қолдауы «Қайсарға» күш береді. «Жетісу» соңғы ойында бас бапкері келіп түлеп сала берді. Азулы «Ақтөбеден» айла асырғасын Смақов шәкірттері де желпініп тұрғаны анық. Өз алаңында «Қайсар» кімге болса да оңай қарсылас емес. Сондықтан олар жеңілмейді деп ойлаймын. 

Жалпы бұл турда өткен турдағыдай сенсация көп болады деп санамаймын. Трансферлік терезе алдында командалар барынша ұпай жоғалтпауға тырысады. Әрі қарай көре жатармыз...