Тахир Хамрақұлов: «Қайрат» чемпион болғысы келсе жеңіске жетуі тиіс

24–25 мамыр күндері Қазақстан Премьер-лигасының оныншы туры өтеді. Осы ретте спорт журналисі Тахир Хамрақұлов KFF League сайтына алдағы матчтарға қатысты өз болжамын жасады.

 «Қайрат» – «Оқжетпес»

 Өткен турда екі команда да жеңілістің ащы дәмін татты. Көкшетау клубы өз алаңында «Ақтөбеден», алматылық ұжым Семейде «Елімайға» есе жіберген болатын. Биыл бас жүлдеге қол созуды қалайтын «Қайрат» үшін әрбір кездесудің маңызы зор. Мен, бұл ретте тартысты ойын болады деп күтемін. Өйткені, көкшетаулық футболшылар оңайшылықпен ешкімнің ығына жығыла қоймайды. Дегенмен «Қайраттың» деңгейі жоғары. Сондықтан өз алаңында Рафаэль Уразбахтин шәкірттері 1-2 доп басымдығымен жеңіске жетеді деген ойдамын.

 «Ордабасы» – «Ұлытау»

Шымкенттік команданың доп додасындағы ойын өрнегі енді түзеліп келеді. Десе де көш соңында келе жатқан жезқазғандық клубтың да кез-келген қарсыласқа лайықты қарсылық көрсете алатынын байқап жүрміз. Менің ойымша, «Ордабасы» екі-үш доп айырмасымен басым түседі.

«Астана» – «Жеңіс»

Елорданың қос командасының кездесуі аса тартысты өтетініне сенемін. «Жеңіс» аталған қарсыласын кубок ойындарында қапы қалдырып кетті. «Астана» қарымта қайтаруға тырысады. Жорамалым бойынша «Астананың» жеңісі немесе тең нәтиже тіркеледі.

«Жетісу» – «Ақтөбе»

Биылғы біріншілікте «Жетісу» сәтсіз ойын көрсетіп келеді. Есесіне «Ақтөбенің» қарқыны жоғары екені көрініп тұр. Жеңісті ақтөбелік клубқа беремін.

«Қызылжар» – «Елімай»

Турнир кестесінде командалар қатарлас келеді. Өткен турда «Қайратты» сүріндірген семейлік футболшылар сол сәттілік сериясын жалғастырғысы келеді. Жасыл алаң төрінде тартысты ойынды күтемін. Тең нәтиже тіркеледі деген ойдамын.

«Атырау» – «Қайсар»

Биыл «Атыраудың» жолы болар емес. Олар құрамына шетелдік және қазақстандық ойыншыларды қоса алды. Десе де қатарынан тоғыз ойында жеңілістің ащы дәмін татқан олар өткен турда сол сәтсіздік сериясын тоқтата алды. Ал кілең қазақстандық футболшылардан құралған «Қайсар» бұдан бұрын «Тұранды» тізе бүктірді. Қызылордалық клуб жеңісті жолын жалғастырады деген ойдамын.

 «Тұран» – «Тобыл»

Түркістандық клуб біріншілікті сәтті бастаған еді. Десе де соңғы бес турда ала-құла ойын көрсетіп жүр. Ал «Тобыл» соңғы бес кездесудің төртеуінде жеңіске жетті. Бұл жолы да үш ұпай олжалап қайтады деген сенімдемін.